Happiness Alaskatasuna?

Into The Wild

NIRE LURRA, NIRE ANAIAK, NIRE AMETSAK
        Joxe Azurmendi , 1965

Nire lurra, nire anaiak,
ametsak nireak. Urteen zalapartan
orok galdu zuen
niretasunaren poza.

Ez ote nuen aski neure buruarekin
besteengatik arduratzeko?
Nire ez zen edozein bide batetan
sartu nintzen.

Denok ahaztu zintuztedan
oroimena huts
gauaren mugan eseri nintzenean.
Non gaudenezko gabe gabiltza-eta.

Errukiz eta isekaz ikusten nituen
handik ametsak, anaiak
lurra, gaztaroaren zoroaldiko
urruntasunetan lausoturik.

Lagunduko ezin badut
zertako gelditu inor entzutera?
Gauden bakean zentzunik ez duenari
erantzun eske joan barik.
Pipa honi kea dario
zergatikorik batere gabe.
Galdetu baino hobe itzali
edo trankil-trankil erre...
Ez ote da gehiegi
norbera zaintzea?

Goizaldean egunaren leihoa
edegirik, itzartu naizenean
hotzak gogor nengoen.
Ez dut oinazearen ibaia sentitzen
nire lurraren samin errerik
ez nire anaien goserik.

Baina badirudi mespreziatzen nauela
izadi osoak. Badirudi
oroimena baino
hutsagoa dudala bihotza,
ez dakitela nora joan oinok.

Badirudi galdu egin naizela
eta ez nindoan inora.

Baina atzera abiatuko naiz
gaztetako bihotzaren bila:
nire lurra, nire anaiak
nire ametsak.

Eta egia da erantzunik ez dudala,
beharbada egon ez baitago.
Baina nire poesian galdezka daude
berriro nire ametsak
nire anaiak, nire lurra.

Sorterrian

Nekez uzten du bere sorterria
sustraiak han dituenak.
Nekez uzten du bere lurra zuhaitzak
ez bada abaildu eta oholetan.
Ez du niniak begia uzten
ez bada erroi edo arrubioen mokoetan.
Nekez uzten du gezalak itsasoa
ez hare harriak basamortua.
Ez du liliak udaberria uzten
ez elurrak zuritasuna.
Bere sorterria nekez uzten du
sustraiak han dituenak.

Joseba Sarrionandia

Orlegia

Euria, haizea, tenperatura epela, lainoak, kresala, belar usaina... Hitz berriak nere hiztegian.
Hegakinetik ikusi nuen. Lainoz estalita zegoen lurralde bat, kostaldea okertzen den lekuan, lurra tolestu egiten den tokia.  Laino artean zelai berde, teilatu gorri, bailara estu... porlana eta galipotezko zauriak, sugeak balira.  Txikia zirudien. Dena txikia; lurraldea bera, bailarak, mendiak, herriak, kaleak, kamioiak, kotxeak...
Denbora batez bertan gelditzea erabaki nuen.
Eta kolorez berdea zen.

Eta berdea ere usaina; belarra, goroldioa... hezetasuna, ur txirripak tarrapataka, lohia... eta kresala... uhinen joan etorria hondartzan, itsasoaren urdin amaigabe beti ezberdina...

Berdea piñua, berdea pagoa, berdea belarra, berdea pikoletoaren txaketa...
 Orlegia edo Berdea naturan oso ohikoa den kolore bat da. Landare gehienak berdeak dira klorofila dutelako fotosintesia egiteko. Orlegi izena espektro elektromagnetikoaren barnean uhin luzera 520-570 nanometro artekoa duen koloreari dagokio.
 

Berdea?

Alde batetik aberriaren berdea buruan, egun gutxitan han izango naizela jakinik hango udaberriko zelai berdeak etortzen bait zaizkit burura.
Beste alde batetik hemen ere berdea ikusten hasi bait da ere. Baina ezin konfiatu eta egun batzutan udaberri giroko eguzki goxoaz disfrutatu ondoren berriro ere elurra ari du. Eta mara mara!
Beraz azken egun hauetan powderra dastatzeko aukera izaten ari gara. Ez da neguko "champagne" powder famatua, baina apirila erdialdean gaudelarik ez dago batere gaizki.

Gorria

Bai, hala da, Colorado-ko lur gorria agertzen hasi da elurra urtzen den heinean. Azken aste honetan tenperatura altuak eta udaberri giroa. Elurra azkar ari da urtzen eta denboraldi bukaera gertu.
Martxoak 25an Bowl-en egindako hiru jeitsieren bideoa jartzen dut hemen, udaberriko eskia izan daitekeenaren erakusgarri.
Elur asko bota zuen aste horretan eta hurrengo bi egunetarako beste ekaitz bat omen dator; tenperatura hotzak eta elur dexente. ea egia den.

Urdina

http://www.youtube.com/watch?v=ITM8-HEacus

Martxoa bukaera eta aste ederra egunero elur hautsaz gozatuz. Egun batzuk elurretan eta beste batzutan elur osteko eguzki eta zeru urdinaz gozatuz. Hotza aurpegi eta hanka puntetan, baina burua bero, hortzak zorrotz eta hankak erretzen. Denboraldi bukaeraren hasiera. Azken tantoak txapa gainean moztuta.

Txurian